افتتاحيه العدد

1- ليه عملت المدونه؟؟

سؤال مهم ..انا بحب الاسئله الكويسه ...
يمكن لانى مش شاعر ..ولم اؤتى مجامع الكلم .. ولا انا كاتب ولا مخرج او ممثل او رسام ..ولو ان ليا كتابات بس بحتفظ بيها لنفسى.. باختصار انا واحد من الناس الغلابه اللى معندهمش وسيله يعبروا بيها عن مشاعرهم فيضطروا انهم يكتموها جواهم .. فى الحقيقه انا بحسد الشعراء على موهبتهم ..بعتقد ساعات انهم اسعد الناس ..لانهم مش مسجنونين زينا داخل ذاتهم ..عندهم القدره على التعبير ..عندهم سلاح يعجز الفانتوم والميراجز وحتى النووى عن تدميره ..عندهم سلاح الكلمه .. الكلمه التى لو كانت فى الحق تنؤا بها الجبال ..لانهم باختصار ...أحرار....

2 - ليه دلوقتى؟
لانى بمر باصعب مرحله فى حياتى.. وطبعا..وبما انى مقدم على الانتحار فكان لازم اغنى ..قصدى اكتب ..على راى محمد فؤاد .. من وانا عندى 14 سنه وانا نفسى اكتب ..بس كنت حاسس انى عاجز .. شئ صعب جدا انك تاخد قلم وورقه وتكتب ... بيتهيقلى الفرق بين شكسبير وبين شعبان عبدالرحيم ..ان الاولانى قدر انه يكسر الرهبه بينه وبين الكتابه من بدايه حياته ..وبالتالى قدر يكتب ويقدم روائعه ..طبعا مش قصدى بالضبط ..بس بيتهيقلى شعبان زيه زى شكسبير وعنده نفس المشاعر والافكار وزى اى انسان تانى بس باسلوب مختلف تبعا للثقافه والتعليم ..

3- هتكتب ايه ؟

هكتب اللى عندى....امال يعنى هتكب اللى عند غيره ...هكتب فى السياسه ..او الفلسفه الاغريقيه..او السينما .او علم النفس او التاريخ ..او الشعر مش عارف بس المهم هكتب ..

4- طيب وهنا يهمنا اللى عند حكيمك ده فى ايه فى ايه ؟

مش عارف ؟!!!!

5- طيب ليه اسلوبك ركيك كده؟

لان دى مقدمه ضروريه واستهلال لابد منه ..فلازم تكون باسلوب بسيط علشان مخنقش حد من الاول .. لكن بدايه من اللحظه دى كل الكتابات هتكون باللغه العربيه الفصحى ..واتمنى ان لو كتب اى رد يكتبه باللغه العربيه برضه .. ..عارف هتتخنوقوا منى بس هعمل ايه ..انا عبد المأمور
نبدا بقى انا تعبت من المقدمه دى هى مقدمة ابن خلدون ..توكلنا على الله ...